Hetimet në rrugë operative, mosndërhyrja në kohë, sinjalizimi i trafikantëve në rastet e operacioneve policore, por edhe bashkëpunimi me ta janë disa prej arsyeve që e kanë detyruar Shërbimin për Cështjet e Brendshme dhe Ankesat në Vlorë të kërkojë masa sigurimi për disa oficerë të saj. Kësisoj u kërkua masa e sigurisë për 6 efektivë policie të Komisariatit të Policisë së Himarës. Ata janë me detyrë që nga oficer i patrullës e deri tek inspektorë zonash, apo edhe specialistë të hetimit të krimit. Masat e sigurimit për punonjësit e Policisë dolën në funksion të procedimit penal në fushën e kultivimit të narkotikëve, ku dyshohet se në keqpërdorim të atributeve që u jepte detyra, kanë lejuar këtë veprimtari të kundërligjshme, kryer nga shtetas të ndryshëm, duke konsumuar elementët e “Shpërdorimit të detyrës”. Pas një hetimi 6-mujor me metoda speciale u dokumentua me prova ligjore veprimtaria e kundërligjshme e punonjësve të Policisë, veprimet dhe mosveprimet e të cilëve kanë favorizuar shtetas të ndryshëm në veprimtarinë e kultivimit të narkotikëve.