Në një poligon stërvitjeje ushtarake pranë qytetit të Wroclaw, janë rreshtuar qytetarë të ndryshëm, në pritje që të marrin armët dhe të mësojnë si të qëllojnë. "Sapo të mbushet fisheku, arma është gati për të qëlluar", bërtet instruktori, një ushtar polak, me fytyrën e lyer me bojë kamuflazhi. Të rinj e të moshuar, burra e gra, prindër e fëmijë, të gjithë kanë ardhur këtu për një arsye: për të mësuar si t’i mbijetojnë një sulmi të armatosur. Programi i quajtur "Stërvitu me Ushtrinë", u mëson gjithashtu civilëve luftime trup më trup, ndihmën e shpejtë dhe si të vendosin një maskë gazi. "Kohërat janë të rrezikshme tani, duhet të jemi gati", thotë koordinatori i projektit, Kapiten Adam Sielicki. "Kemi një kërcënim ushtarak nga Rusia dhe po përgatitemi për këtë., shton ai. Kapiten Sielicki thotë se programi është i mbingarkuar dhe qeveria polake tani ka plane ta zgjerojë atë në mënyrë që çdo mashkull i rritur në vend të marrë trajnim. Polonia, e cila kufizohet me Rusinë dhe Ukrainën, thotë se do të shpenzojë pothuajse 5% të PBB-së për mbrojtje këtë vit, më e larta në NATO.