Rebelët rusë anti-Putin raportohet se kanë mbërritur në frontin e ri verior, në Ukrainë, për të ndihmuar vendin që të zbrapsë sulmin e Moskës. Kjo vjen pasi Presidenti ukrainas, Volodimir Zelensky fajësoi "botën" për forcat ruse që mundën të merrnin qindra kilometra tokë ukrainase në vetëm një javë, në avancimin më të shpejtë të tyre në një vit të tërë. Të enjten, zëvendëskomandanti i Legjionit Rusia e Lirë, Maksimilian Andronikov, që njihet me emrin e luftës Cezar, tha se luftëtarët e tij i ishin bashkuar trupave ukrainase që po luftojnë në kufirin verilindor. Grupi gueril i angazhuar prej kohësh në mbrojtjen e ukrainës, ka luftuar në disa prej betejave më të përgjakshme në vend e madje ka kryer edhe operacione në tokë ruse. Tani, ai thotë se do të ndihmojë Kievin në forcimin e mbrojtjes në Harkiv. Sipas zëvendëskomandantit të legjionit që përbëhet nga shtetas rusë që luftojnë kundër vendit të tyre, avancimi i fundit i trupave të putinit ka ndodhur për shkak të mungesës së armëve në Ukrainë. "Ne e ndiejmë këtë mungesë. Ne e dimë se nëse do të kish qenë ndryshe, armiku nuk do të kishte bërë as edhe një hap para këtu apo në Donbas", tha ai.