Ish-presidenti rus Dmitry Medvedev akuzoi të martën liderët evropianë se po përpiqen të përshkallëzojnë rrezikshëm konfliktin në Ukrainë pas rizgjedhjes së ish-presidentit të SHBA-së, Donald Trump. Medvedev, një zyrtar i lartë i sigurisë, shkroi në Telegram se politikanët evropianë po synojnë "ta shtyjnë konfliktin me Rusinë në një fazë të pakthyeshme", ndërkohë që paralajmëroi kundër lejimit të Kievit që të përdorë raketa perëndimore me rreze të gjatë veprimi për të qëlluar objektivat brenda Rusisë. Medvedev hodhi poshtë ato që ai i quajti "ultimatumet" e lëshuara nga lideri i opozitës gjermane dhe kancelari i ardhshëm i mundshëm Friedrich Merz në lidhje me përdorimin e armëve të tilla nga Ukraina duke thënë se ato kanë thjeshtë "natyrë elektorale". “Është e qartë se këto raketa nuk janë në gjendje të ndryshojnë asgjë në mënyrë domethënëse gjatë operacioneve ushtarake”, tha ai. “Në përgjithësi, është e habitshme se deri në çfarë mase gjenerata aktuale e politikanëve evropianë dëshiron ta zvarrisë luftën në territorin e vet”, tha Medvedev. Më herët ai kishte thënë se fitorja e Trumpit do të ishte një lajm i keq për Ukrainën. Donald Trump, një republikan, ka kritikuar vazhdimisht shkallën e ndihmës perëndimore për Kievin dhe ka premtuar t'i japë fund konfliktit me shpejtësi, pa shpjeguar se si. Kremlini hodhi poshtë të hënën raportet se Trump kishte folur me presidentin rus Vladimir Putin ditët e fundit, me zëdhënësin Dimitri Peskov që foli për "fantazi të pastër".