Politikani i opozitës ruse, Lev Shlosberg, është dënuar me 11 vite e një muaj burg. Shlosberg, 63 vjeç, u shpall fajtor për “diskreditimin” e forcave të armatosura ruse dhe “përhapjen e informacionit të rremë” lidhur me ushtrinë. Akuzat ndaj tij lidhen me deklarata të publikuara në rrjetet sociale, ku politikani ka kundërshtuar luftën në Ukrainë. Në fjalën e tij përfundimtare, ai i mohoi të gjitha akuzat, duke e cilësuar procesin gjyqësor si një “imitim të një hetimi”, të ngritur me synimin për të ndëshkuar qëndrimin e tij politik dhe publik. “Detyra e vetme e gjykatës ishte të ndëshkonte një person për pozicionin e tij politik, publik dhe civil”, deklaroi ai pas vendimit. Gjatë seancës, Shlosberg përsëriti gjithashtu thirrjen për armëpushim mes Rusisë dhe Ukrainës dhe për nisjen e një dialogu politik. Partia Yabloko, në të cilën Shlosberg është nënkryetar, ka bërë të ditur se do ta apelojë vendimin. Yabloko ishte e vetmja parti e regjistruar në Rusi që kundërshtoi pushtimin në shkallë të plotë të Ukrainës në vitin 2022. Në fillim të këtij muaji, partia u hoq nga fletët e votimit, ndërsa autoritetet e akuzuan për mbështetje publike të “lëvizjes ndërkombëtare LGBT”, të cilën Rusia e ka shpallur organizatë ekstremiste.