Lulzim Basha i cili prej 22 marsit 2022 u tërhoq nga politika aktive për shkak të humbjes në zgjedhjet e pjesshme të 6 marsit dhe kërkesës së deputetëve për të mbajtur përgjegjësi këtë disfatë, vendosi të merrte një tjetër hap. Menjëherë pas zgjedhjeve të 14 majit, ku Partia Demokratike humbi thellë në zgjedhje, u rikthye me retorikë kryetari, duke paralajmëruar kështu rikandidimin e tij, të cilin e bëri fakt të kryer më 20 qershor. Por si duket ashtu si edhe dorëheqja, e cila kurrë nuk u bë ligjërisht, edhe rikthimi ishte i paracaktuar, njësoj edhe si rruga që do të ndiqte. Një fakt i tillë është thënë edhe më herët nga Top News, por këtë të enjte u pohua edhe nga një prej anëtarëve të Kryesisë së PD-së të Bashës dhe deputet në Kuvendin e Shqipërisë, Saimir Korreshi. Ky i fundit, duke kundërshtuar rikthimin e Lulzim Bashës, u shpreh se e gjithë ajo që po ndodh në PD, po bëhet për interesa personale, duke shkuar edhe më tej, e treguar pjesë nga skenari i rikthimit të ish-kryedemokratit. Sipas Saimir Korreshit, Lulzim Basha mund të ishte rikthyer edhe para zgjedhjeve, por një hap i tillë nuk u mor, pasi së bashku me të do të duhej të merrte koston e humbjes së demokratëve në zgjedhje, duke lënë të nënkuptohet se humbja ishte e parashikuar. Sipas Korreshit, Lulzim Basha, për interesa personale po rikthehet në krye të partisë.