Një burrë në Francë zbuloi këtë vit një thesar ari në vlerë 800 mijë dollarë, teksa po gërmonte për të ndërtuar një pishinë në kopshtin e tij, njoftuan autoritetet. Ai njoftoi menjëerë policinë për thesarin, por pas verifikimeve iu lejua që ta mbante arin pasi nuk vinte nga një sit arkeologjik. Sipas gazetës lokale Le Progres, ai gjeti “pesë lingota ari dhe shumë monedha” të mbështjella në çanta plastike. Policia konfirmoi se ari ishte blerë ligjërisht dhe ishte shkrirë rreth “15 apo 20 vjet më parë” në një rafineri të afërt. Për shkak se lingotat kishin numra unikë të gjurmueshëm, u përcaktua se nuk ishin të vjedhura. Sipas kodit civil francez të shekullit XIX, thesar konsiderohet “çdo gjë e fshehur ose e varrosur, për të cilën askush nuk mund të provojnë pronësinë, dhe që zbulohet krejt rastësisht”. Pronësia i përket personit që e gjen atë në tokën e tij, raporton Le Progres. Bashkia shtoi se pronari i mëparshëm i kopshtit ka ndërruar jetë, dhe se si arriti ari atje mbetet një mister.