Moti i keq ka prekur Greqinë të dielën ndërsa stuhi të forta, erëra të fuqishme dhe pluhur afrikan janë kombinuar për të krijuar kushte shqetësuese në disa rajone. Shërbimet e trageteve janë anuluar që nga mëngjesi i të dielës ndërsa pasdite pjesë të greqisë perëndimore dhe veriore u përballën me shira të rrëmbyeshëm dhe stuhi. Këto kushte sipas ekspertëve mund të çojnë në përmbytje lokale dhe ndërprerje të transportit. Në të njëjtën kohë, erëra shumë të forta po përshkojnë Greqinë lindore, veçanërisht mbi Detin Egje, ku janë krijuar kushte të vështira në det. Shërbimet e trageteve janë pezulluar në portet kryesore, përfshirë Pireun, Rafinën dhe Lavrio-n, duke anuluar nisjet dhe duke ndërprerë rrugët lokale të ishujve në pritje të një rivlerësimi të mëvonshëm të motit. Kushtet meteorologjike kanë bërë po ashtu që pluhuri afrikan të mbulojë Greqinë lindore, veçanërisht rajonet jugore dhe qendrore, duke përfshirë Peloponezin, Kretën etj. Që nga mëngjesi i së dielës, Athina u pa e mbuluar nga pluhuri i dendur, duke zvogëluar ndjeshëm shikueshmërinë dhe duke krijuar një atmosferë të mjegullt dhe mbytëse. Monumentet ikonike si Akropoli dhe Kodra e Likabetit ishin pothuajse të errësuara ndërsa pluhuri grumbullohej në ajër. Një dobësim gradual i fenomenit pritet gjatë natës së të dielës. Parashikimet tregojnë se nivelet e pluhurit do të ulen gjatë natës, me qiellin që pritet të pastrohet plotësisht rreth orës 8 të mëngjesit të së hënës, kur parashikohet që shikueshmëria dhe cilësia e ajrit të përmirësohen ndjeshëm.