32 deputetë të Partisë Demokratike kanë firmosur pro platformës së kreut të grupit të tyre parlamentar Enkelejd Alibeaj për bashkimin e demokratëve. Partia Demokratike ka 52 deputetë në Kuvend dhe siç duket kjo është shumica në grupin parlamentar që do të vendosë mbi fatet e PD-së. Emrat e 32 deputetëve që kanë mbështetur këtë platformë janë lexuar një për një nga Enkelejd Alibeaj, duke përfshirë dhe emrin e ish-kryetarit të Partisë Demokratike, Lulzim Basha. Ajo që vihet re është se platforma nuk ka gjetur mbështetjen e asnjë prej deputetëve që njihen si mbështetës të ish-kryeministrit Sali Berisha dhe janë pjesë e Komisionit të Rithemelimit.