Gjashtë punonjës në Aeroportin e Frankfurtit, Gjermani, janë prekur nga malaria, dhe njëri prej tyre ka humbur jetën. Rastet u konfirmuan nga operatori i aeroportit, Fraport, dhe Instituti Robert Koch. Katër raste ishin raportuar në mesin e korrikut, por numri i përgjithshëm është rritur që atëherë në gjashtë. Pesë punonjësit e tjerë të prekur nga sëmundja po i nënshtrohen trajtimit specifik mjekësor. Sipas raporteve fillestare, infeksionet lidhen me të ashtuquajturën "Malaria e Aeroportit", një mënyrë e rrallë transmetimi jashtë zonave ku sëmundja është e pranishme. Një ose më shumë mushkonja të infektuara mund të kenë mbërritur në aeroport në mes të verës, të jenë transportuar në hambarin e një avioni ose në bagazh nga një zonë rreziku, dhe më pas të kenë pickuar dhe infektuar punonjësit e aeroportit. Autoritetet e aeroportit thanë se kanë marrë masa duke përfshirë vendosjen e kurtheve dhe pajisjeve për tërheqjen dhe djegien e mushkonjave. Këto të fundit do të testohen në antverp për praninë e mundshme të parazitit përgjegjës për malarjen. Aeroporti ka informuar ndërkohë punonjësit duke i nxitur ata të kërkojnë ndihmë mjekësore nëse konstatojnë ndonjë simptomë. Instituti Robert Koch raportoi raste të tjera midis korrikut dhe gushtit në zonën metropolitane të Rhine-Mainit, që ka të ngjarë të lidhen me punën në Aeroportin e Frankfurtit. Autoritetet shëndetësore kanë sqaruar, megjithatë, se transmetimi nga personi në person nuk luan asnjë rol: infeksioni ndodh përmes pickimit të një mushkonje.