Izraeli ka ndërmarrë një seri sulmesh nga ajri mbi Liban, duke vrarë të paktën 3 persona dhe plagosur disa të tjerë, sipas Ministrisë libaneze të Shëndetësisë. Ushtria izraelite tha se goditi një grup të lidhur me Hezbollah që trafikonte armë. Ushtria izraelite konfirmoi më tej se sulmet u ndërmorën afër Shebës ndersa tha se ka vrarë dy trafikantë nga Brigada për Rezistencë Libaneze, një grup i lidhur me Hezbollahun. “Terroristët ishin të përfshirë në trafikimin e armëve që përdoren nga Hezbollahu dhe aktivitetet e tyre përbënin shkelje flagrante të mirëkuptimit mes Izraelit dhe Libanit”, tha ushtria izraelite duke iu referuar armëpushimit që i dha fund mbi një vit armiqësi mes Izraelit dhe Hezbollahut, grup që mbështetet nga Irani. Hezbollahu është shpallur grup terrorist nga Shtetet e Bashkuara, ndërsa Bashkimi Evropian e ka në listën e zezë krahun ushtarak të grupit libanez, por jo partia politike.