Të paktën 30 persona u vranë në përleshjet në jug të Sirisë, ndërsa autoritetet dërguan atje forca për të qetësuar situatën. Dhjetëra persona u plagosën gjithashtu. Dhuna shpërtheu mes fiseve beduine sunite dhe luftëtarëve nga pakica fetare Druze në qytetin Sueida. Ministria e Brendshme e Sirisë tha se të paktën 30 persona janë vrarë, ndërsa Vëzhguesi Sirian për të Drejtat e Njeriut, grup që monitoron luftën, raportoi se numri i viktimave është 37. Luftërat mes grupeve të ndryshme minoritare në Siri u përshkallëzuan që nga rënia e regjimit të presidentit Bashar al-Assad, në dhjetor. Për vendosjen e rregullit brenda vendit tashmë është duke punuar një qeveri islamike. Ministria e Brendshme siriane tha të hënën në mëngjes se forcat e saj do të ndërhyjnë drejtpërdrejt për të zgjidhur konfliktin dhe për të ndaluar përleshjet në Sueida. Guvernatori i këtij qyteti, Mustapha al-Bakur, u bëri thirrje banorëve që “të ushtrojnë vetëpërmbajtje dhe t’u përgjigjen thirrjeve kombëtare për reforma”. Udhëheqësit shpirtërorë bënë gjithashtu thirrje për qetësi.