Ish zëvendës ministri rus i mbrojtjes, gjeneral koloneli Mikhail Mizintsev, i është bashkuar milicisë private Vagner në rolin e zëvendës komandantit – raportuan të enjten kanalet ruse pro luftës në mediat sociale. Në dy video të postuara nga korrespondenti i luftës Aleksander Simonov, në telegram, Mizinstev, i veshur me uniformën e Vagnerit, shihej teksa vizitonte një kamp trajnimi dhe inspektonte pozicionet ruse në qytetin ukrainas të Bakhmutit. Pamjet koincidonin edhe me publikimin e dy deklaratave nga themeluesi i Vagnerit, Jevgeni Prigozhin, që me zemërim akuzoi lidershipin e ushtrisë ruse se po i linte forcat e tij pa municione vetëm për shkak të xhelozisë për suksesin e tyre. Ndërsa Prigozhin rregullisht ka akuzuar kastën ushtarake të kremlinit, përfshirë ministrin e mbrojtjes Sergei Shoigu, për inkompetencë, ai ka vecuar komandantë të caktuar të cilët i ka lëvduar. Më 29 prill, shërbimi i shtypit i Prigozhin, tha se ai ishte ofruar të pranonte në grupin e tij Mizintsev, një ditë pasi u raportua se ai ishte shkarkuar nga posti i zëvendësministrit të mbrojtjes. Mizintsev, që ka orkestruar rrethimin e qytetit ukrainas të Mariupolit në muajt e hershëm të luftës, vitin e kaluar, u bë zëvendësministër i mbrojtjes në shtator, i ngarkuar për logjistikën dhe furnizimet. Grey Zone, një kanal në telegram i afërt me Vagnerin, shkruante se Mizintsev nuk ishte as i pari dhe as i fundit gjeneral që nuk kishte vend në mesin e burokracisë së kremlinit. BE vendosi sanksione mbi Mizintsevin në qershor, duke e quajtur atë ‘kasapin e Mariupolit’ për rolin e tij në rrethimin që shkatërroi qytetin.