Dita e fundit e muajit qershor ishte afati përfundimtar në kuadër të periudhës së katërt raportuese për vendet e Ballkanit Perëndimor për t’i përmbushur reformat e parashikuara nga Plani i Rritjes. Këto shtete kanë afat deri më 15 korrik për të dorëzuar raportet mbi hapat e zbatuar të reformave. Komisioni Evropian do të vlerësojë përmbushjen e reformave dhe më pas do të shpërndajë fondet kur ato të jenë zbatuar plotësisht. “Tashmë po shohim përparim të rëndësishëm: 78 për qind e reformave në tri rundet e para të raportimit tregojnë ose sukses të plotë, ose të paktën njëfarë përparimi, ndërsa vetëm 22 për qind janë të bllokuara”, tha një zëdhënës I KE. Mjetet financiare nga Plani i Rritjes janë të kufizuara në kohë. Nëse vendet përfituese të Ballkanit Perëndimor nuk i përmbushin kushtet, Komisioni Evropian ka të drejtë t’i mbajë fondet e destinuara për këta hapa reformues. Këto fonde, sipas rregullave të Planit të Rritjes, mund të rishpërndahen te vendet që arrijnë rezultate më të mira në zbatimin e reformave.