Admirali Brad Cooper, kreu i komandës qendrore amerikane, dhe shefi i shtabit të Përbashkët, Gjenerali Dan Caine, informuan presidentin amerikan Donald Trump mbi planet për sulme të mundshme kundër Iranit. Axios raporton se takimi i së enjtes zgjati 45 minuta. Presidenti amerikan Donald Trump, ishte planifikuar të merrte informata mbi planet për një seri sulmesh të reja ushtarake për ta detyruar Iranin të negociojë një fund të konfliktit, tha një zyrtar i SHBA-së për Reuters. Axios tha se një nga planet që iu paraqit Trumpit përfshinte përdorimin e forcave tokësore për të marrë nën kontroll një pjesë të ngushticës për ta rihapur atë për lundrimet tregtare. Trump po shqyrton gjithashtu zgjatjen e bllokadës amerikane ose shpalljen e një fitoreje të njëanshme, thanë zyrtarët. Opsione të tilla kanë qenë prej kohësh pjesë e planifikimit të SHBA-së, por raportet fillimisht nxitën rritje të mëdha në çmimet e naftës, me naftën e papërpunuar Brent që arriti në më shumë se 126 dollarë për fuçi në një moment.