Franca dhe Britania kanë propozuar një armëpushim të pjesshëm një-mujor mes Rusisë dhe Ukrainës, që do të përfshinte vetëm ndalimin e sulmeve ajrore, detare dhe ndaj infrastrukturës energjetike. Kjo marrëveshje përjashton luftimet tokësore. Presidenti francez Emmanuel Macron, në një intervistë për gazetën franceze “Le Figaro”, tha se një armëpushim i tillë do të ishte i vështirë për t'u verifikuar në terren, për shkak të distancës së madhe nga fronti, duke theksuar se kjo e fundit është e barabartë me largësinë nga Parisi në Budapest. Presidenti francez foli për gazetën franceze gjatë udhëtimit për në Londër për një takim të udhëheqësve europianë, të organizuar nga kryeministri britanik, Keir Starmer. Një takim që synon të çojë përpara përpjekjet për hartimin e një plani për të siguruar paqe për Ukrainën. Në kuadër të planit të paqes së përbashkët franko-britanik, trupat europiane mund të dërgoheshin në Ukrainë vetëm në një fazë të dytë. Macron konfirmoi se nuk ka asnjë plan për dërgimin e trupave evropiane në Ukrainë në javët e ardhshme. Presidenti francez gjithashtu theksoi nevojën për të rritur shpenzimet për mbrojtjen. Ndërkohë, Presidenti ukrainas Volodymyr Zelenskiy, i pyetur për planin e marrëveshjes, tha: “Unë jam i vetëdijshëm për gjithçka”.