Një plagosje me armë zjarri ka ndodhur mesditën e kësaj të hëne në Pogradec, ku ka mbetur i plagosur një 35-vjeçar. Ngjarja ka ndodhur në lagjen numër tre pas një konflikti, ku Nikolla Agolli qëlloi me armë drejt Brian Syzo. Burimet bëjnë me dije se plumbi e ka goditur në një nga venat kryesore të këmbës dhe për këtë arsye është transportuar me helikopter drejt spitalit të Traumës. Brian Syzo është një emër i njohur për policinë, pasi ka precedent penal. Ai është i njohur për prodhim dhe shitje narkotikësh, ndërsa është përfshirë disa herë në konflikte në qytetin e Pogradecit. Autori i dyshuar i ngjarjes, Nikolla Agolli u plagos vitin e kaluar nga Sindi Syzo, vëllai i Brianit, në një berberhanë. Ngjarja ka ndodhur në lagjen nr 1 të Pogradecit në janar të 2025 dhe plagosja e sotme dyshohet se është hakmarrje.