Shërbimi për Çështjet e Brendshme dhe Ankesat ka dhënë detaje për ngjarjen e ndodhur një ditë më parë në Mamurras, ku mbetën të plagosur tre persona, dy prej të cilëve efektiv të policisë. Lidhur me këtë ngjarje janë arrestuar katër persona ndër to edhe polici i patrullës në Mamurras David Madani, i cili qëlloi me armë duke lënë të plagosur dy kolegët e tij dhe personin tjetër të përfshirë në konflikt. Po ashtu është arrestuar Gjon Fufi, Nikoll Fufi dhe Rudolf Fufi. Ngjarja ndodhi një ditë më parë në Mamurras pas një sherri mes 4 personave dhe një patrulle policie. Gjatë sherrit, efektivi i arrestuar David Madani në kushtet e vetëmbrotjes dhe pasi i ka paralajmëruar ata, ka qëlluar me armë zjarri, por nga pakujdesia plumbat kanë prekur dy kolegët e tij Ilir Zeka dhe Flamur Lleja si dhe Nikoll Fufin, i cili ishte përfshirë në sherrin me efektivët, duke i plagosur të tre në këmbë. Të plagosurit janë jashtë rrezikut për jetën dhe ndodhen në spital për kurim të mëtejshëm. Ndërkohë polici i arrestuar akuzohet për veprat penale “Plagosje e rëndë në kapërcim të kufijve të mbrojtjes së nevojshme” dhe “Plagosje e rëndë nga pakujdesia”.