Policia e Tiranës ka identifikuar dhe shpallur në kërkim një 32-vjeçar, i dyshuar si autor i plagosjes me armë zjarri të ndodhur një ditë më parë në hyrje të Domjes, ku mbeti i plagosur 26-vjeçari Fabjo Arifaj. Sipas njoftimit të policisë Grisjan Latifaj, 32 vjeç, banues në Domje, dyshohet se ka qëlluar me pistoletë ndaj të riut gjatë një konflikti për motive të dobëta. Ndërkohë, policia ka arrestuar vëllain e autorit të dyshuar, shtetasin me inciale J.M., pas një kontrolli në banesën e tij ku u gjetën dhe sekuestruan një armë zjarri pistoletë, municion luftarak dhe dy radio policie dhe sende të tjera të kundërligjshme. Sherri mes të tyre mësohet se ka nisur që në Domje dhe ka vijuar deri në parkingun e një qendre tregtarë, ku edhe pati të shtëna me armë zjarri, nga të cilat u plagos i riu. I plagosuri po merr trajtim mjekësor në spital dhe ndodhet jashtë rrezikut për jetën. Hetimet vijojnë nga Specialistët për Hetimin e Krimeve të Komisariatit numër 7, nën drejtimin e Prokurorisë së Tiranës, me qëllim identifikimin e personave të tjerë që mund të kenë qenë të përfshirë dhe dokumentimin e plotë të rrethanave të ngjarjes.