Një 40-vjeçar i identifikuar si Ergyst Shtylla është plagosur disa herë me thikë në qendër të qytetit të Korçës, mbrëmjen e të martës, rreth orës 20:15. Sipas informacioneve, I plagosuri është dërguar në spital me një mjet privat. 40-vjeçari ka dëshmuar në ambientet e spitalit, por pa shumë detaje për ngjarjen. I plagosuri ka identifikuar se kush ka qenë autori, i cili është shpallur në kërkim nga ‘uniformat’ blu të Korçës. Ergyst Shtylla është plagosur me thikë tre herë në bark, ndërsa ka treguar se shkak për konfliktin është bërë shitja e një automjeti. Policia ka sekuestruar kamerat e sigurisë që ndodhen në lokalet pranë vendit ku ka ndodhur plagosja, ndërsa pritet përmirësimi i gjendjes së të plagosurit për t’i marrë një dëshmi të dytë më të detajuar për të zbardhur shkaqet dhe konfliktin. Sakaq, grupi hetimor nën drejtimin e Prokurorisë po punon për sqarimin e rrethanave të ngjarjes, identifikimin dhe kapjen e autorit.