Merr fund arratia e Ndriçim Jonuzit, autorit të plagosjes të sekretarit të Partisë Demokratike në Kavajë, Bledar Okshuni. Plagosja e kryer në bashkëpunim edhe me Dorian Troplinin, drejtorin e policisë bashkiake si dhe punonjësin Markel Shtylla, ka krijuar jo pak debat publik dhe politik. Burimet zyrtare bëjnë me dije se Ndriçim Jonuzi 45 vjeç akuzohet për veprën penale “Armëmbajtje pa leje” dhe “Plagosje e rëndë me dashje”. Mësohet se Jonuzi ka qenë me precedent penal, i dënuar me herët me tetë vite burg nga shteti italian për veprën penale vrasje. Ndërkohë u arrestuan edhe dy bashkëpunëtorët Dorian Troplini dhe Markel Shtylla për veprën penale “Moskallëzim i krimit”. E gjithë kjo situatë u interpretua me një prapavijë politike, teksa kryedemokrati Basha dhe presidenti Ilir Meta ngritën akuza për shkaqe politike që çuan në plagosjen e Okshunit. Kryeministri Rama kërkoi vendosjen e autorit para drejtësisë dhe që kreu i shtetit të ulë tensionet. Ka qenë vetë Jonuzi i cili nëpërmjet një videomesazhi ka pranuar publikisht se ka qenë gjithmonë përkrahës i partisë demokratike dhe se kjo ngjarje nuk ka kontekst politik.