Dy turistë amerikanë kanë mbetur të plagosur si pasojë e një sulmi me thikë të ndodhur mëngjesin e së martës në zonën e Akropolit në Athinë. Sulmi me thikë dyshohet se është ndërmarrë nga një person me probleme të shëndetit mendor. Autori u arrestua nga forcat e sigurisë të ndodhura në zonë, teksa dy turistët amerikanë u transportuan me urgjencë në spital për të marrë ndihmë mjekësore. Korrespondenti i Top Channel, Artur Bibe njofton se njëri prej tyre ndodhet në gjendje të rëndë shëndetësore, por jashtë rrezikut për jetën, ndërsa turisti tjetër ka marrë plagë të lehta në dorë. Ky është incidenti i parë ndër vite që shënohet në zonën më të vizituar nga turistët e huaj në Greqi. Çdo ditë në Aropol hyjnë 15 mijë deri në 20 mijë vizitorë, ndërsa zona pranë monumentit është një atraksion turistik botëror me masa të rrepta sigurie.