Ka marrë fund arratia e Engjëll Ibrahimit, 39 vjecarit të kërkuar nga autoritetet e Kosovës, për laboratorin e drogës ku u zbulua 1 ton kanabis. Policia e Elbasanit bëri të mundur lokalizimin dhe arrestimin e të riut në Cërrik, pasi kërkohet nga Gjykata e Pejës për dy akuza. Togat e zeza kanë caktuar ndaj tij masën arrest në burg për “Kultivimi i bimëve të hashashit, shkurres së kokainës ose bimëve të kanabisit" dhe "Blerja, posedimi dhe shitja e paautorizuar e narkotikëve, substancave psikotrope dhe analoge, parashikuar nga Kodi Penal i Republikës së Kosovës. Pritet të nisin procedurat për të bërë të mundur ekstradimin e Ibrahimit nga Shqipëria drejt Kosovës. Pak ditë më parë po në Cërrik, u kap 33 vjecari Albano Saliu, një tjetër person i kërkuar nga Kosova po për laboratorin e drogës, që u zbulua në datë 27 shtator. Policia më herët ka vënë në pranga edhe Erjon Etmenajn 34 vjec, i cili akuzohet për të njëjtat vepra penale si Engjëll Ibrahimi, ndërsa vijojnë të jenë në kërkim Eldi Mykaj si dhe Mirjon Qokli të moshës 27 vjec.