Një operacion i përbashkët mes policisë shqiptare dhe asaj franceze ka vënë në pranga një 50-vjeçar në Paris, pasi ishte në kërkim ndërkombëtar. Paul Deda u arrestuar në kuadër të operacionit ndërkombëtar “The Wanted”, pas informacioneve të shkëmbyera mes autoriteteve të dy shteteve. Policia franceze zbuloi më pas vendodhjen e tij dhe e vuri në pranga në Paris, me qëllim ekstradimin e tij drejt Shqipërisë. Paul Deda akuzohet nga SPAK për trafik ndërkombëtar të lëndëve narkotike dhe pastrim parash, në kuadër të një organizate kriminale. Hetimet kanë zbuluar se ai në bashkëpunim me persona të tjerë shqiptarë dhe italianë, ka tentuar të trafikojë mbi 1 ton kanabis sativa nga Shqipëria drejt Italisë, përmes rrugës detare. Sasia e drogës është sekuestruar në portin e Barit nga autoritetet italiane, ndërsa dy anëtarë të tjerë të grupit janë arrestuar në Itali. GJKKO i ka caktuar Dedas masën e sigurisë “arrest në burg”. Interpol Tirana po vijon bashkëpunimin me autoritetet franceze për të përfunduar procedurat e ekstradimit të Dedës drejt Shqipërisë.