Shkencëtarët John Clarke, Mishel Devoret dhe John Martinis, fituan Çmimin Nobel për Fizikë për "eksperimentet që zbuluan fizikën kuantike në veprim", tha organi që ndan çmimin të martën. "Çmimi Nobel për Fizikë i këtij viti ka ofruar mundësi për zhvillimin e gjeneratës së ardhshme të teknologjisë kuantike, duke përfshirë kriptografinë kuantike, kompjuterët kuantikë dhe sensorët kuantikë", tha Akademia Mbretërore Suedeze e Shkencave në një deklaratë. Fituesit e Çmimit Nobel kryen eksperimente në mesin e viteve 1980 me një qark elektronik të ndërtuar nga superpërçues dhe demonstruan se vetitë kuantike mekanike mund të bëhen konkrete në një shkallë shumë më të madhe, makroskopike. Teknologjia kuantike është tashmë e kudondodhur, me transistorët në mikroçipat e kompjuterëve që janë një shembull i përditshëm. "Jam plotësisht i tronditur. Sigurisht, nuk më kishte shkuar kurrë ndërmend se kjo mund të ishte baza e një Çmimi Nobel", tha Clarke në konferencën për shtyp të ndarjes së cmimit, përmes telefonit. Clarke, i lindur në Britani, është profesor në Universitetin Berkeley, në Kaliforni. Devoret, i lindur në Francë, është profesor në Universitetin Yale dhe Marinis është profesor në Universitetin e Kalifornisë, Santa Barbara. Ky i fundit drejtoi Laboratorin e Inteligjencës Artificiale Kuantike të Google deri në dorëheqjen e tij në vitin 2020. Çmimi Nobel në fizikë jepet nga Akademia Mbretërore Suedeze e Shkencave dhe ka një vlerë prej 11 milionë kronash suedeze ose 1.2 milionë dollarë, e cila ndahet mes fituesve. Fizika ishte kategoria e parë e përmendur në testamentin e Nobelit, duke reflektuar ndoshta rëndësinë e fushës gjatë kohës së tij. Sot, Çmimi Nobel në Fizikë mbetet gjerësisht i konsideruar si çmimi më prestigjioz në këtë disiplinë.