Ish-presidenti bullgar Rumen Radev, pasi kryesoi prej javësh sondazhet, ka fituar tani edhe zgjedhjet parlamentare të parakohshme që u mbajtën në vend të dielën. Partia e tij "Bullgaria Progresive", ka marrë rreth 45 për qind të votave. Tetë palë zgjedhje janë zhvillur në Bullgari pesë vitet e fundit. Sipas Radev, nuk duhet të ketë zgjedhje të tjera, së shpejti. "Do të bëjmë gjithçka për të evituar zgjedhje të tjera. Kjo do të thoshte të kalonim nga një krizë në tjetrën, dhe ne duhet të punojmë shumë seriozisht për t'i kapërcyer këto kriza”, kishte thënë ai më herët. Ka kaluar shumë kohë që Bullgaria nuk ka pasur ketë një fitues kaq të qartë pas zgjedhjeve parlamentare. Radev është 62 vjeç dhe ish‑shef i Forcave Ajrore. Ai është politikani më i preferuar në vend, edhe pse kritikët prej kohësh e akuzojnë për afërsi me Rusinë. Radev ka qenë skeptik në të kaluarën ndaj sanksioneve kundër Rusisë dhe ka kundërshtuar dërgesat e armëve për Ukrainën. Në të njëjtën kohë, partia e tij, Bullgaria Progresive, e ka përfshirë në programin e saj zgjedhor një angazhim të qartë për Bashkimin Evropian dhe NATO‑n. Disa analistë e kanë krahasuar atë me Viktor Orbanin e rrëzuar në Hungari.