Hetimi për katastrofën e Air India, që u rrëzua në qershor pesë minuta pas ngritjes nga qyteti indian i Ahmedabadit duke marrë 260 jetë njerëzish, vazhdon. Sipas disa mediave, Kapiteni Sumeet Sabharëal thuhet se vuante nga depresioni. Sabharëal, një pilot me përvojë që po i afrohej daljes në pension, u tha miqve se pasi humbi nënën e tij disa vjet më parë, ai do të transferohej për të jetuar me babanë e tij, që mbeti vetëm. Bashkëpiloti Clive Kundar gjithashtu kishte orë të shumta fluturimi në karrierën e tij. Të dy kishin kaluar testet e detyrueshme psikologjike dhe fizike të pilotëve në vitet e fundit. Sipas hetimeve fillestare, avioni nuk kishte probleme, por motorët u fikën nga personat në kabinë, qoftë rastësisht apo me qëllim. Një bisedë e zbardhur nga kutia e zezë zbulon se njëri pilot e pyeti tjetrin pse e kishte ndërprerë rrjedhën e karburantit dhe tjetri u përgjigj se nuk e kishte bërë ai. Në ngritje, bashkëpiloti ishte në komandë, ndërsa kapiteni po vëzhgonte. Çelësat u kthyen më pas në pozicionet e tyre normale të fluturimit, gjë që do të kishte shkaktuar automatikisht rindezjen e motorëve. Sipas një raporti, njëri motor po rifitonte shtytjen në kohën e përplasjes. Tjetri u rindez, por nuk arriti të rifillonte shtytjen. Funksionimi i çelësit të kontrollit të karburantit u bë një çështje kyçe pasi raporti paraprak i aksidentit zbuloi se rrjedha e karburantit u ndërpre pak sekonda pas ngritjes së avionit. Linjat ajrore indiane Air India, Air India Express, Akasa Air, SpiceJet dhe IndiGo operojnë gjithsej 150 avionë Boeing 787 dhe 737, të cilët janë të gjithë të marrë me qira dhe për këtë arsye nuk janë të regjistruar në Indi. Shumë prej tyre kanë thënë se tashmë kanë filluar vetë inspektime të mjeteve si masë paraprake.