Ajo që nuk kishte ndodhur asnjëherë më parë në historinë e pluralizmit politik në Shqipëri, u regjistrua të shtunn e 18 dhjetorit, çka edhe konfirmoi çarjen e pakthyeshme të partisë e cila lindi si mishërim i demokracisë. Me vendim të Kuvendit Kombëtar të Partisë Demokratike lideri historik i kësaj force u përjashtua nga të gjitha institucionet drejtuese të partisë që ai vetë themeloi, pas miratimit të rezolutës për të pastruar PD nga “non grata-t”. Në këtë Kuvend i cili vjen pas atij të 11 dhjetorit dhe nga Komisioni i rithemelimit të Partisë Demokratike konsiderohet si një anti-kuvend dhe i paligjshëm, u votua edhe rezoluta e 12 dhjetorit e cila u propozua në Këshillin Kombëtar. Kjo rezolutë e miratuar nga Kuvendi e cilëson mbledhjen e Kuvendit të 11 dhjetorit të thirrur nga ish-kryeministri Sali Berisha si “të jashtëligjshme”. Sipas rezolutës vendimet janë nul dhe nuk kanë asnjë vlerë politike apo ligjore për PD, ndërsa akuzon organizatorët për shpërdorim të logos, simboleve e vulës së partisë Demokratike. Sipas organizatorëve të Kuvendit të 18 dhjetorit, në Pallatin e Kongreseve morën pjesë 5004 delegatë, por që e gjitha vihet në pikëpyetje pasi ky ambient me 4 sallat e tij nuk merr më shumë se 3000 ppersona. Në këtë pikë ngrihet pyetja se ku votuan 2004 delegatët e tjerë, pasi PD zgjodhi votim të hapur dhe jo me kuti. Lidhur me këtë PD zyrtare nuk ka dhënë ende asnjë përgjigje.