Ky është momenti i arrestimit të dy shtetasve, përkatësisht 31 dhe 34 vjeç, kushërinj me njëri tjetrin, të cilët furnizonin me lëndë narkotike Kokainë, shtetas dhe grupe, për ta ndarë në doza dhe shitur në 2 zona të kryeqytetit, në Allias dhe ‘Oxhaku’. Operacioni antidrogë “Hallka e parë”, u finalizua nga Komisariati i Policisë Nr. 4, pas marrjes së informacionit në rrugë operative. Sipas njoftimit zyrtar të Policisë, dy kushërinjtë shpërndarës, janë konstatuar duke lëvizur me automjetin me të cilin dyshohej se transportohej lënda narkotike. Ata janë ndjekur nga shërbimet e Policisë, deri në vendin e quajtur “Treshi”, ku është ndaluar për kontroll. Gjatë kontrollit të imtësishëm, në këtë automjet u gjetën 2 pako me 2 kg e 235 g lëndë të dyshuar narkotike Kokainë dhe 1 pistoletë e dyshuar lodër. Dy shtetasit akuzohen për veprën penale “Prodhimi dhe shitja e narkotikëve”. Sakaq, vijojnë hetimet për identifikimin dhe nxjerrjen përpara përgjegjësisë penale, të të gjithë shtetasve të përfshirë në këtë veprimtari kriminale.