Administrata e presidentit amerikan, Donald Trump, njoftoi se do të pezullojë nga puna të gjithë punonjësit me kontratë të Agjencisë së Shteteve të Bashkuara për Zhvillim Ndërkombëtar (USAID) në mbarë botën dhe se do të tërheqë mijëra pjesëtarë të stafit që punojnë jashtë vendit. “Të premten, më 7 shkurt, të gjithë punonjësit me kontratë të USAID-it do të pezullohen në gjithë botën”, thuhet në një njoftim në uebsajtin e USAID-it, i cili ka qenë jashtë funksionit prej fundjavës së kaluar. Forca punëtore e USAID numëron më shumë se 10.000 persona. Rreth dy e treta e stafit shërben jashtë vendit, sipas Shërbimit Kërkimor të Kongresit. Agjencia ka më shumë se 60 misione kombëtare dhe rajonale. Për stafin e USAID jashtë vendit, Uashingtoni është duke përgatitur një plan në koordinim me Departamentin e Shtetit dhe do të mbulojë shpenzimet e udhëtimit të personelit për t'u kthyer në Shtetet e Bashkuara brenda 30 ditësh, thuhet në njoftim.