Gjashtë punonjës policie u pezulluan nga detyra pasi dyshohet se lejuan kultivimin e kanabisit në zonën e Shkodrës. Urdhri I dhënë nga Gjykata e Shkodrs u ekzekutua nga ana e Agjencisë së Mbikëqyrjes Policore. Nën akuzë janë vendosur dy nënkomisarët Gjergj Mala dhe Ardian Baçina si dhe inspektorët Faik Latifi, Kristjan Lokthi, Zef Doçi dhe Sokol Kroni. Ata akuzohen për kryerjen e veprës penale “Shpërdorim Detyre” kryer në bashkëpunim. Sipas AMP, nga hetimet e thelluara disa mujore dyshohet se këta punonjës policie nuk kanë asgjësuar rreth 1000 bimë narkotike, të cilat u gjetën në proces tharje gjatë një operacioni të zhvilluar në Korrik të këtij viti, pavarësisht se janë konstatuar nga ana e tyre gjatë kontrollit të territorit në Njësinë Administrative Shalë, Bashkia –Shkodër. Policia gjatë muajve të verës ka zhvilluar një sërë operacionesh në zonën e Alpeve, duke zbuluar parcela të shumta të mbjella me lëndë narkotike. Gjatë kësaj kohe këta efektivë kanë pasur si detyrë kontrollin e zonës së Tethit.