Deputeti i zgjedhur i Partisë Socialiste, Petro Koçi do të dëshmojë ditën e hënë para hetuesve të Prokurorisë së Posaçme kundër Korrupsionit dhe Krimit të Organizuar, pas denoncimit që bëri për tenderat në Bashkinë e Fierit. Marrja në pyetje e Koçit vjen vetëm një javë pasi denoncoi në rrjetet sociale, ku shkruante se tenderat janë në duart e mafias. Nga ana tjetër SPAK ka nisur verifikimet për deklaratat e forta të të zgjedhurit të PS-së në Fier. Më 16 korrik, Petro Koçi akuzoi institucionet e qarkut të Fierit si të lidhura me krimin. Koçi fliste për tendera publikë në qarkun e Fierit që fitohen nga trafikantët e drogës. Por edhe pse nuk e tha me emër, i vetmi institucion që jep tendera në nivel lokal, është bashkia e drejtuar nga Armando Subashi. Pas denoncimit edhe Partia Demokratike ka bërë thirrje për verifikime konkrete. Deputeti i zgjedhur në Fier nga radhët e Partisë Demokratike, Luan Baçi, në një postim në Facebook, shkruante se Partia Demokratike ndër vite ka bërë denoncime të tilla në lidhje me kapjen e institucioneve publike nga krimi.