Vetëm pak ditë më parë, udhëheqësit evropianë po përpiqeshin të gjenin një përgjigje për retorikën gjithnjë e më agresive të Presidentit të SHBA-së Donald Trump në lidhje me marrjen e kontrollit të Grenlandës dhe prisnin një ortek fyerjesh ndërsa ai mbërriti në Davos. Siç pritej, Trump kritikoi në fjalimin e tij Evropën, për një sërë cështjesh. Por ai gjithashtu përjashtoi përdorimin e forcës për të aneksuar territorin danez që ai e dëshiron, duke ulur tensionet që kërcënonin të ardhmen e NATO-s. Ai më pas shkoi një hap më tej në një takim me shefin e NATO-s Mark Rutte, duke njoftuar se kishin arritur një marrëveshje për Grenlandën dhe se ai nuk do të vendoste më tarifa për vendet evropiane që kundërshtojnë ambiciet e tij. Nuk është ende e qartë se çfarë përfshihet në kornizë, ose roli i saktë i Ruttes në negociata. Por kthesa mahnitëse e Trumpit e ka vënë sërish në qendër të vëmendjes sekretarin e përgjithshëm të NATO-s, i cili është shfaqur si një figurë kyçe për një Evropë të lodhur që po përpiqet t’i bëjë ballë presidentit amerikan. Në shikim të parë, ata përbëjnë një çift joortodoks. Rutte, një teknokrat i sjellshëm, është kryeministri më jetëgjatë i Holandës, pasi ka përfunduar një mandat 14-vjeçar që pasqyron pragmatizmin dhe aftësinë për të krijuar konsensus mbi çështjet e mprehta. Ai është gjithashtu i njohur për imazhin e tij të qetë dhe të relaksuar, duke shkuar me biçikletë në punë edhe kur drejton vendin. Ndërkohë, Trump është një ish-manjat i pasurive të patundshme dhe personalitet televiziv i njohur për lëvizjet e tij dramatike dhe një tendencë drejt unilateralizmit. Por marrëdhënia e tyre daton vite më parë. Si udhëheqës holandez nga viti 2010 deri në vitin 2024, Rutte bëri disa vizita në Uashington gjatë mandatit të parë të Trumpit, duke hedhur themelet për një ofensivë sharmi që duket se i ka shërbyer mirë atij, por edhe aleancës ushtarake që tani drejton. Akti më i famshëm i Ruttes për të qetësuar Trumpin ndodhi në një takim të NATO-s vitin e kaluar. Pasi Trump përdori fjalë të pahijshme në përgjigje të armiqësive mes Izraelit dhe Iranit, dhe më pas bëri analogji me dy fëmijë që luftojnë për të fituar betejën mes tyre, Rutte bëri shaka: "Babi ndonjëherë duhet të përdorë gjuhë të fortë". Shkëmbimi u bë viral dhe duket se i ka pëlqyer shumë edhe vetë Trumpit. Duke folur në Davos të mërkurën, ai tha në një moment: "Më kanë quajtur 'Babi', apo jo? Herën e fundit. Një burrë shumë i zgjuar tha: 'Ai është babai ynë'".