Pesë të rinj rusë që iu larguan mobilizimit ushtarak të shpallur në shtator të vitit të kaluar nga Putin, janë bllokuar në aeroportin ndërkombëtar Incheon të Koresë së jugut, prej muajsh, pasi autoritetet refuzuan ti pranonin ata. Tre burrat, mbërritën në tetor, ndërsa dy të tjerët në nëntor – tha avokati i tyre. Ai shtoi se aplikimet e tyre për statusin e refugjatit u refuzuan nga ministria e drejtësisë së vendit, duke i lënë ata të bllokuar në zonën e nisjeve prej muajsh, ndërkohë që presin një vendim për apelin e tyre. “Atyre u është siguruar një vakt në ditë, që është dreka”, thotë avokati, “por për pjesën tjetër të ditës ata jetojnë vetëm me bukë dhe pije”. Të rinjtë mund edhe të bëjnë dush, por duhet të lajnë rrobat e tyre me dorë dhe nuk mund të dalin nga zona e nisjeve dhe e duty free-ve.