Pesë nga njëmbëdhjetë protestuesit e Partisë Demokratike, që u arrestuan gjatë protestës të zhvilluar të premten do të qëndrojnë në burg. Për herë të parë gjykata e Tiranës vendosi të lë në qeli protestuesit e ndaluar. Edhe pse avokatët e tyre kërkuan që masat të mos I shqyrtonte gjyqtari Enkel Peza, me pretendimin se ai dhe familjarët e tij kanë mbajtur funksione në strukturat lokale në Kavajë, kërkesa e bërë prej tyre nuk u mor parasysh. Kështu bazuar dhe në provat e paraqitura nga prokuroria Gjykata vendosi të lë në qeli Klement Çuçkën, Bujar Tushën, Henri Shapllon, Mirvel Tocillën dhe Semi Bicin. Ndërkohë për gjashtë të tjerë u la në fuqi masa e sigurisë detyrim paraqitje. Ata akuzohen për veprat penale “Kundërshtim i punonjësit të rendit publik”, “Prishja e rendit dhe qetësisë publike”, ‘’Mbajtje pa leje të armëve shpërthyese dhe municionit. Të pranishëm në gjykatë ishin dhe përfaqësues të Partisë Demokratike mes të cilëve dhe sekretari i përgjithshëm, Flamur Noka.