Presidenti i Ukrainës, Volodymyr Zelensky, gjatë një deklarate tha se është krenar për vendin e tij, për “tre vjet të rezistencës” dhe për “tre vjet të heroizmit të ukrainasve”. Zelensky e bëri këtë deklaratë në 3-vjetorin ku Rusia nisi pushtimin në shkallë të plotë të Ukrainës, më 24 shkurt, 2022. “Faleminderit për të gjithë ata që e mbrojnë dhe e ndihmojnë Ukrainën. Për të gjithë ata që punojnë për Ukrainën. Dhe, qoftë i përjetshëm kujtimi për të gjithë ata që dhanë jetën e tyre për shtetin dhe popullin tonë”, tha Zelensky. Për të shënuar këtë ditë, ai thirri një samit ndërkombëtar të sigurisë në Kiev. Fituesi i zgjedhjeve në Gjermani dhe kancelari i mundshëm i ardhshëm, Friedrich Merz, e dënoi agresionin rus dhe krimet e luftës. Në Londër, Qeveria britanike pritet të shpallë një raund të ri sanksionesh kundër Rusisë.