Vala e të nxehtit që ka përfshirë Evropën nuk po tregon shenja zbutjeje ndërkohë që duket se po zgjerohet drejt pjesës lindore të kontinentit, me temperatura që pritet të lënë pas 30 gradët Celcius në Paris, Romë, Berlin, Vjenë, Pragë dhe Varshavë. Organizata Botërore Meteorologjike, agjencia për motin dhe klimën e Kombeve të Bashkuara, deklaroi një ditë më parë se do të duhet të mësohemi të jetojmë me normalitetin e ri të valëve ekstreme të të nxehtit, të cilat do të ndodhin më shpesh dhe do të jenë më intensive edhe në vitet që do të vijnë. Vështja e reagimit ndaj kësaj situate, sipas britanikes Guardian, po bëhet gjithnjë e më shumë një çështje politike, pasi pjesë të elektoratit evropian vazhdojnë të shprehin dyshime për koston e politikave për klimën. Shefja e tranzicionit të gjelbër të BE-së, Teresa Ribera, i tha BBC se frika politike po pengon përpjekjet e Evropës për t’u përballur me efektet e krizës klimatike, edhe pse kontinenti po goditet nga një valë rekord të nxehti. Ribera tha se, ndonëse efektet e emergjencës klimatike po bëhen gjithnjë e më të dukshme, nuk po shihet ende reagim me veprimet e duhura pasi disa parti politike në evropë “vazhdojnë të këmbëngulin fuqishëm, se ndryshimi i klimës nuk ekziston”, ose thonë se marrja e vendimeve për t’u përshtatur me realitetet mjedisore është shumë e kushtueshme.