Lufta tregtare mes Shteteve të Bashkuara dhe Kanadasë është përshkallëzuar edhe më tej. Administrata e presidentit Donald Trump ka vendosur kufizime të reja ndaj një sërë produktesh kanadeze, përfshirë alkoolin, produktet e qumështit dhe motoçikletat. Masat e reja u shpallën përmes një serie urdhrash ekzekutivë dhe pritet të hyjnë në fuqi më 29 shtator. Shtëpia e Bardhë argumenton se Kanadaja po diskriminon produktet amerikane, pasi vendos kufizime ndaj tyre që nuk aplikohen në të njëjtën mënyrë për mallrat nga vende të tjera. Për disa produkte të tjera, Uashingtoni ka vendosur rritje të tarifave të importit. Masat prekin lloje të ndryshme djathi, lëkurë dhe lëkura të papërpunuara, letër, disa lloje mobiljesh dhe dyshekësh, metale si alumini dhe hekuri, varka me motor, karroca golfi, pjesë për pajisje peshkimi dhe centrale. Vendimi i SHBA vjen pasi Kanadaja ka vendosur kundër-tarifa ndaj mallrave amerikane. Masat kanadeze prekin produkte si çeliku, veshjet dhe mobiljet dhe kanë hyrë në fuqi më 8 shtator. Kryeministri kanadez Mark Carney tha se largimi i vendit nga SHBA-ja si partneri kryesor tregtar do të ketë një kosto, por sipas tij, kostoja e mosreagimit do të ishte edhe më e madhe.