Tensionet mes Pakistanit dhe Afganistanit janë përshkallëzuar sërish, pasi Pakistani kreu sulme ajrore dhe dërgoi trupa tokësore në provincat afgane përgjatë kufirit. Qeveria talebane e Afganistanit deklaron se të paktën 36 civilë, përfshirë gra dhe fëmijë, janë vrarë dhe mbi 160 persona janë plagosur. Kabuli i ka cilësuar sulmet si një “akt frikacak” dhe “krim”. Nga ana tjetër, ministri pakistanez i Informacionit tha se operacioni kishte në shënjestër strehimet e militantëve dhe se 29 prej tyre u vranë. Sipas Islamabadit, sulmet ishin përgjigje ndaj sulmeve të fundit terroriste në Pakistan. Pakistani akuzon prej vitesh Afganistanin se strehon grupe të armatosura, të cilat kryejnë sulme ndërkufitare. Qeveria talebane i mohon këto akuza dhe, nga ana e saj, akuzon Pakistanin për sulme të paprovokuara që godasin civilët. Përplasjet mes dy vendeve janë shtuar muajt e fundit, pavarësisht një armëpushimi të arritur tetorin e kaluar, i cili më vonë u shkel.