Ushtria izraelite ka njoftuar se më shumë se 250 mijë banorë janë larguar nga Qyteti i Gazës gjatë javëve të fundit, për shkak të intensifikimit të operacioneve ushtarake. “Sipas vlerësimeve të Forcave të Mbrojtjes të Izraelit, më shumë se një e katërta e një milion banorëve të Qytetit të Gazës janë larguar për sigurinë e tyre,” ka deklaruar në rrjetin X, zëdhënësi i ushtrisë izraelite në gjuhën arabe. Ushtria izraelite ka përshkallëzuar sulmet ndaj objektivave të dyshuara të Hamasit në qendrat urbane të Gazës, duke intensifikuar ofensivën tokësore dhe ajrore. Ndërkohë, autoritetet vendore dhe organizatat ndërkombëtare paralajmërojnë për pasoja të rënda humanitare. Eksodi masiv i civilëve ka rënduar më tej krizën humanitare në Rripin e Gazës, ku mungesa e ushqimit, ujit të pijshëm, medikamenteve dhe strehimit ka arritur nivele kritike. Që nga shpërthimi i konfliktit mes Izraelit dhe Hamasit, numri i palestinezëve të vrarë ka kaluar shifrën e 65 mijë e 650, si pasojë e sulmeve izraelite.