Ministria e Infrastrukturës dhe Energjisë ka nisur zyrtarisht procedurat për zgjidhjen e kontratës koncesionare të Aeroportit Ndërkombëtar të Vlorës. Autoritetet konfirmuan se arsyeja kryesore ishte mosrespektimi i afateve të parashikuara në kontratë për përfundimin e një prej projekteve më të mëdha infrastrukturore në vend. Më herët, ministri i Infrastrukturës ka bërë të ditur se qeveria u kishte lënë 30 ditë afat dy shoqërive aksionere, Mabco Constructions të Behgjet Pacollit dhe 2A Group të Valon Ademit, për të zgjidhur mosmarrëveshjet mes tyre dhe për t’i hapur rrugë rifillimit të punimeve në aeroport. Megjithatë, punimet mbetën të pezulluara për shkak të konfliktit mes aksionerëve, i cili përfundoi në dyert e gjykatave. Me nisjen e kësaj procedure, qeveria kaloi në fazën e radhës të mekanizmave kontraktorë për zgjidhjen e situatës së krijuar. Punimet për ndërtimin e Aeroportit Ndërkombëtar të Vlorës nisën zyrtarisht në nëntor të vitit 2021. Sipas kontratës koncesionare dhe planit fillestar të investimit, aeroporti ishte parashikuar të përfundonte brenda rreth tre vitesh dhe të niste operimet gjatë vitit 2025.