Të paktën 82 viktima u shënuan nga përplasjet mes banorëve të sekteve të ndryshme në veriperëndim të Pakistanit ndërsa u plagosën 156 të tjerë raporton agjencia e lajmeve AFP. Pakistani është shtet me shumicë të myslimanëve sunitë, mirëpo rajoni Kurram – afër kufirit me Afganistanin – ka popullsi të madhe shiite dhe komunitetet atje janë përleshur me dekada. Vala e madhe e përleshjeve ka nisur të enjten, ku humbën jetën 43 persona. Gjatë përleshjeve pati dhe të shtëna me armë zjarri. “Përleshjet e 21, 22 dhe 23 nëntorit kanë rezultuar me 82 të vrarë dhe 156 të plagosur”, ka thënë një zyrtar lokal, duke folur në kushte anonimiteti. “Në mesin e të vrarëve janë 16 sunitë, ndërsa 66 tjerë janë të komuniteti shiit”, ka thënë ai. Rreth 300 familje është thënë të jenë shpërngulur këto ditë, si pasojë e luftimeve të ashpra. Policia ka pasur gjithmonë vështirësi që të ndalë dhunën në rajonin Kurram.