Tensionet në seancë edhe kësaj here detyruan kreun e Kuvendit, Niko Peleshi që të mbyll punimet para kohe dhe të kaloj në votim rendin e ditës. Me kartonat e saj mazhoranca votoi pro rizgjedhjes së Denar Bibës si anëtar të Komisionit të Konkurrencës, 75 vota pro, 0 abstenim, dhe 5 kundër si dhe emerimin e Eldian Ballës. Po ashtu u emërua dhe Diana Dervishi si anëtare e Këshillit drejtues të Autoritetet të Komunikimeve Elektronike dhe Postare. Me 79 vota pro dhe një kundër kaloi dhe Projektligji “Për aderimin e Republikës së Shqipërisë në Traktatin e Singaporit mbi Ligjin e Markave Tregtare, bërë në Singapor, më 27 mars 2006”. Me 77 vota pro dhe 2 kundër kaloi dhe Projektligji “Për ratifikimin e vendimit nr. 1/2025 të Komitetit të Përbashkët, i krijuar nga marrëveshja e tregtisë së lirë, ndërmjet Republikës së Shqipërisë dhe Republikës së Turqisë, për ndryshimin e marrëveshjes ndërmjet Republikës së Shqipërisë dhe Republikës së Turqisë, duke zëvendësuar protokollin II të saj, në lidhje me përcaktimin e konceptit të “produkteve origjinuese” dhe metodave të bashkëpunimit administrativ”. Me shumicë votash kaluan dhe pikat e tjera të rendit të ditës, ndërsa Projektligji “Për disa shtesa dhe ndryshime në ligjin nr. 34/2019, datë 17.06.2019, “Pёr administrimin e pasurive të sekuestruara dhe të konfiskuara”, të ndryshuar”, I propozuar nga deputeti demokrat Klevis Balliu u rrëzua me 79 vota kundër dhe katër pro. Ndërkohë deputeti kërkoi heqjen e nismës ligjore nga rendi I ditës, por gjatë votimit kërkesa u hodh poshtë nga mazhoranca. Ndërkohë deputetët e opozitës u larguan nga salla.