Një aksident rrugor është regjistruar paraditen e kësaj të hëne në aksin Pogradec-Korçë, në segmentin e Qafë Plloçës. Në aksident janë përfshirë dy automjete, të cilat po udhëtonin në sense të kundërta. Sipas të dhënave paraprake, njëri prej mjeteve ka humbur kontrollin dhe për pasojë është përplasur me automjetin që po vinte përballë. Përplasja ka shkaktuar dëmtime te dy shtetase. Ato janë transportuar për në Spitalin e Pogradecit për të marrë ndihmën e nevojshme mjekësore. Sipas informacioneve, dy të dëmtuarat fatmirësisht ndodhen jashtë rrezikut për jetën. Ndërkohë, në vendngjarje kanë mbërritur shërbimet e Policisë, të cilat kanë nisur verifikimet për të dokumentuar rrethanat e aksidentit. Grupi hetimor po punon për të përcaktuar dinamikën e plotë të përplasjes dhe shkakun që solli humbjen e kontrollit të njërit prej automjeteve.