Dy ishin deputetët e Partisë Demokratike të pranishëm në sallë gjatë diskutimeve për ndryshimin e ligjit për mbrojtjen e tokës bujqësore në Komisionin e Ligjeve, por kreu i këtij komisioni, Ulsi Manja u bashkangjiti atyre edhe socialistin Damian Gjiknuri. Debatet mes socialistëve lindën nga përfshirja në një nen të projektligjit të vendosjes së kullave për prodhimin e energjisë nga era. Nga Ministria e Bujqësisë argumentuan se ky parashikim nuk cenon tokën bujqësore dhe se kullat do të ndërtohen pa bazamente me beton, apo struktura të tjera që dëmtojnë tokën prodhuese. Argumentimi i tyre nuk bindi deputetin socialist, Damian Gjiknuri. Përfaqësuesit e Ministrisë së Bujqësisë thanë se kufizimet për ndërtimin e këtyre kullave do të parashikohen nga vendimet e Këshillit të Ministrave. Nga opozita deklaruan se kjo nuk mund t’i lihet në dorë qeverisë.