Për të dytën ditë radhazi, punonjësve të shoqërisë Mabco të Behgjet Pacollit i bllokohet hyrja në kantierin e ndërtimit të aeroporitit ndërkombëtar të Vlorës, si pasojë e përplasjeve që dy drejtuesit e kompanive ndërtuese, Pacolli dhe Valon Ademi, kanë për ndarjen e kuotave. Në një deklaratë zyrtare, Mabco e konsideron këtë situatë një vetëgjyqësi, duke sqaruar se nuk ka asnjë vendim gjyqësor që pengon hyrjen e punonjësve në kantier. “Nuk ekziston asnjë vendim gjyqësor që ndalon hyrjen e Mabco-s ose nënkontraktorëve të saj në aeroportin që ajo ka ndërtuar me investimet e veta. Vendimi gjyqësor i pretenduar dje nga Valon Ademi dhe i shperndare ne media është ai që pezullon përkohësisht të drejtën e votës së Mabco-s në shoqëri, vendim që aktualisht ndodhet në shqyrtim në Gjykatën e Lartë. ASNJË vendim gjyqësor nuk ka ndaluar hyrjen fizike të Mabco-s në kantier. Ky ndalim i njëanshëm dhe arbitrar është vetëgjyqësi e pastër kriminale nga ana e z. Valon Ademi dhe ortakut minoritar 2%, e kryer nëpërmjet administratorit të kontestuar Vegim Hoxha dhe Bujar Ejupi.”