Gjykata e Durrësit caktoi masën e sigurisë arrest me burg për taksistin 26 vjeçar që aksidenoi për vdekje një 66 vjeçar në trotuar në zonën e plazhit pak ditë më parë. Gjykata vlerësoi se edhe arrestimi i tij në flagrancë ishte i ligjshëm. Aksidenti ndodhi më 17 gusht në lagjen 13 të qytetit bregdetar dhe skena është filmuar nga kamerat e sigurisë të bizneseve pranë. Nga pamjet duket se automjeti, drejtues i të cilit ishte 26-vjeçari niset papritur nga vendi ku qëndronte i parkuar dhe drejtohet me shpejtësi drejt të 66-vjeçarit, të cilin e përplasi pas një muri. Si pasojë e përplasjes 66 vjeçari ndërroi jetë në spitalin rajonal të Durrësit. Ngjarja mund të kishte marrë përmasa edhe më tragjike, pasi katër persona të tjerë, përfshirë edhe fëmijë shpëtuan mrekullisht nga përplasja. Ndërkohë, vetë taksisti ka deklaruar se ishte duke pritur në anë të rrugës për të marrë një pasagjer kur makina i ka lëvizur duke u ngjitur në trotuar. Ai është shprehur se nuk e ka kuptuar se si ndodhi e gjithë ngjarja.