28 persona janë plagosur pasi një azilkërkues 24-vjeçar afgan përplasi makinën me një turmë njerëzish në Mynih në atë që zyrtarët thanë se me gjasa, ishte një sulm i dyshuar, ndërsa qyteti gjerman përgatitet të presë një konferencë të nivelit të lartë të sigurisë. Policia në qytetin jugor tha se një makinë iu afrua automjeteve të policisë të ndaluara për shkak të një proteste të mbajtur nga sindikata Verdi përpara se të merrte shpejtësi sërish dhe të godiste njerëzit. Sulmi i dyshuar e kthen sigurinë përsëri në qendër të vëmendjes përpara zgjedhjeve federale që do të mbahen javën e ardhshme, pas disa sulmeve të tjera të mëhershme në Gjermani. Ai gjithashtu erdhi disa orë përpara se figura kryesore ndërkombëtare, duke përfshirë zëvendëspresidentin amerikan JD Vance dhe presidentin ukrainas Volodymyr Zelenski, të mbërrijnë në qytet për të marrë pjesë në Konferencën e Sigurisë së Mynihut, një konferencë kjo e profilit të lartë e cila fillon të premten. "Ka qenë me shumë gjasa një sulm," u tha gazetarëve kryeministri i shtetit të Bavarisë, Markus Soeder. Ministri i Brendshëm rajonal tha ndërkohë se nuk dyshonte se akti kishte ndonjë lidhje me konferencën e sigurisë, që do të mbahet vetëm rreth 1.5 kilometra larg nga vendngjarja. Policia tha se kishte ndaluar shoferin dhe nuk e konsideronte atë një kërcënim të mëtejshëm.