Gjykata e Durrësit këtë të mërkurë ka caktuar masën e sigurisë ‘arrest me burg’ për 44-vjeçarin Rezart Abazaj që rrezikoi jetën e efektivëve të policisë duke e përplasur mjetin e tyre me makinën e tij, në tentativë për t’i shpëtuar ndalimit. Avokati mbrojtës u shpreh se 44 vjecari e pranoi akuzën dhe se ka qenë në gjendje të dehur në momentin e incidentit, por pozita e tij është e rënduar pasi ky është një rast i përsëritur. Mbrëmjen e 16 majit në zonën e ish-Kënetës, 44-vjeçari Rezart Abazaj, në gjendje të dehur përplasi me makinë mjetin e policisë në tentativë për tu larguar. Patrulla ishte njoftuar nga banorë të zonës për një drejtues që lëvizte me shpejtësi dhe në mënyrë të pakontrolluar. Gjatë ndjekjes, në përpjekje për t’i shpëtuar policisë, Abazaj ka lëvizur mbrapsht dhe ka përplasur mjetin e efektivëve.