Një përplasje mes një treni mallrash dhe një autobusi në turqinë veriperëndimore i ka marrë jetën gjashtë personave dhe ka plagosur shtatë të tjerë të shtunën. Aksidenti ndodhi në një pjesë të hekurudhës që përshkon provincën Tekirdag, dhe treni u përplas ashpër me një autobus në të cilin udhëtonin punonjës të një fabrike tekstilesh që ktheheshin nga turni i natës. Të gjitha viktimat ishin pasagjerë të autobusit që u tërhoq zvarrë për shumë metra pas përplasjes me trenin. Imazhet tregonin mjetin e shkatërruar e të përmbysur, mbi shinat e trenit. Pamje nga kamerat në rrugë tregonin shoferin e autobusit që përpiqej të manovronte në pikëkalimin me një barrierë të ulur për të kaluar shinat para se treni të godiste mjetin. Në 2018-ën, 25 persona humbën jetën kur një tren pasagjerësh doli nga shinat në Corlu. Për atë aksident u fajësua shiu i rrëmbyeshëm në zonë që kishte bërë që një pjesë e trasesë të shembej. Vitin e kaluar, zyrtarët në turqi thanë se aksidentet hekurudhore në vend ishin tre herë më të larta se mesatarja globale ndërsa sindikatat e punonjësve të hekurudhës paralajmëruan se reduktimi i kostove kishte shkaktuar probleme në siguri.